22.11.2022 Скопје
Екологијата и влијанието на нашето секојдневие врз животната средина и светот е една од актуелните теми на денешницата која не го заобиколи ни светот на патувањата.
Сè повеќе патници сакаат да остават што е можно помалку јаглероден отпечаток во нивните авантури и да го истражуваат светот и максимално да го намалат нивното негативно влијание врз местата што ги посетуваат. Но, и самото патување до дестинацијата може да биде „позелено“, па многу луѓе избираат алтернативни превозни средства во однос на најголемиот загадувач, а тоа е авиоиндустријата.
Затоа, во последниве години возовите повторно се во тренд, бидејќи патувањето со воз е еден од најодржливите начини за патување.
Во Европската Унија железничкиот транспорт сочинува само 1,6 отсто од емисиите на јаглерод диоксид и превезува 6 отсто од сите патници и повеќе од 10 отсто од товарот.
Некои компании отидоа и чекор подалеку во охрабрувањето на луѓето да ги остават своите автомобили на паркинзите и да почнат почесто да се возат со воз.
Во Обединетото Кралство, компанијата „Трејнхагер“ започна кампања во која за секој купен билет за воз преку нивната платформа, компанијата засадува дрво, а се обврза да инвестира третина од профитот во зазеленување на јавните површини.
Од компанијата „Трејнхагер“ истакнуваат дека грижата за природата нема дополнителен трошок за самите потрошувачи. Во „Трејнхагер“ веруваат дека тоа ќе поттикне уште повеќе луѓе да го изберат возот, ќе знаат дека со нивното купување придонеле планетата да биде позелена и со повеќе кислород.
Во реализацијата се вклучени и шумските институции и со нивна помош точно ќе се утврди каде е потребно да се засади и кои видови дрвја се најпогодни на одредени локации.
Секоја година во Велика Британија се продаваат 1,8 милијарда билети за воз. Кога само еден отсто од сите клиенти би купиле билет преку „Трејнхагер“, би биле засадени околу 10 милиони нови дрвја, поради што сите се убедени во големиот успех на овој стартап.
Покрај „Трејнхагер“, кој може да купи билети за воз во Велика Британија преку веб-страница и мобилна апликација, пребарувачот „Екозија“ со седиште во Берлин има и кампања за садење дрвја. Пребарувајќи ги термините на „Екозија“, вие помагате да се зазелени светот, а оваа компанија досега има засадено повеќе од 160 милиони дрвја.
Аудиоклипот „This Song Plants Trees“ е додаден десетици илјади пати на плеј-листата на „Спотифај“ иако не станува збор за песна, туку за проект на Мет Гордон кој вети дека ќе засади дрво на секое стото преслушување.
Подготвено од А.Ѓ.
About Author
