14.11.2022 Скопје
Прес-центарот на бугарското Министерство за одбрана соопшти дека заедничката мисија за засилена заштита на бугарскиот воздушен простор почнува денеска, во која ќе учествуваат шесте шпански ловци „Еурофајтер“ Ф-200 кои слетаа во саботата во воздухопловната база Безмер.
До 2 декември, бугарските и шпанските борбени авиони ќе извршуваат задачи во рамките на мисијата на НАТО за засилена заштита на воздушниот простор долж источното крило на Алијансата.
Бугарското Министерство за одбрана прецизираше дека во реализацијата на заедничките задачи за зајакнување на заштитата на воздушниот простор на Бугарија, пред се ќе се користат бугарските воени ловци.
Пред неколку недели, бугарскиот министер за одбрана Димитар Стојанов ја соопшти веста за пристигнувањето на шесте шпански борбени авиони „Еурофајтер”, заради учество во заштитата на воздушниот простор во таа земја. Воедно, соопшти и дека шпанските борбени авиони ќе бидат распоредени и во Романија во периодот од декември 2022 до март 2023 година, со осум авиони Ф-18 М таму заедно со група од 130 воени лица. Заедно со нив во Романија ќе биде инсталиран и радар со долг дострел.
Според бугарскиот министер за одбрана Стојанов, целта на присуството на шпанските сили во двете земји е зајакнување на источното крило на НАТО.
Подготвено од А.Ѓ.
About Author
