26.10.2022 Скопје
Владата на Киев соопшти украинските бегалци да не се враќаат во својата земја до пролет, за да помогнат во намалувањето на притисокот врз енергетскиот систем по бранот руски напади.
Вицепремиерката Ирина Верешчук изјави дека мрежите нема да можат да се справат, потенцирајќи дека треба да ја преживеат зимава. Воедно, додаде дека иако би сакала Украинците да се вратат напролет, важно е засега да се воздржат од враќање бидејќи ситуацијата само ќе се влоши.
Украинскиот претседател Володимир Зеленски изјави дека руските воздушни напади уништиле повеќе од една третина од енергетскиот сектор во земјата.
Економијата на Украина претрпе многу удари од почетокот на војната. Зеленски го повика светот итно на помош за покривање на очекуваниот буџетски дефицит од 38 милијарди долари следната година.
Меѓународниот монетарен фонд (ММФ) рече дека на Украина ќе и требаат 3 милијарди долари секој месец за да ја преживее следната година, и 5 милијарди долари ако бомбардирањето на Москва се интензивира.
Серхи Кирал, заменик-градоначалникот на западниот град Лавов, изјави дека стратегијата на Русија е да ја оштети критичната инфраструктура пред зимата и да ја доведе војната во области надвор од линијата на фронтот.
Русија соопшти дека почнала да ги напаѓа енергетските мрежи на Украина како одмазда за нападот на мостот што ја поврзува Русија со окупираниот Крим, иако Киев не соопшти дека стои зад нападот на мостот.
Од руската инвазија на Украина во февруари, агенцијата за бегалци на ОН регистрирала околу 7,7 милиони бегалци од Украина низ Европа, вклучително и Русија, од околу 44 милиони жители.
Подготвено од А.Ѓ.
About Author
