20.10.2022 Скопје
Денеска, лидерите на Европската Унија треба да се сретнат во Брисел на уште еден дводневен самит, на кој фокусна точка ќе биде влијанието на војната во Украина врз енергетскиот пазар на блокот.
Прашањето за тоа како да се намалат цените на гасот се очекува да ги задржи лидерите фокусирани, бидејќи неодамнешниот предлог на Европската комисија не објасни како може да функционира ограничувањето на цената на тој енергенс.
Повеќето земји бараат таква мерка, додека некои, вклучително и Германија и Холандија, остануваат скептични.
Нацрт-законот, претставен во вторникот, предвидува можност за ограничување на големопродажните цени само како последно средство.
Се очекува лидерите на ЕУ да разговараат за тоа како да се финансираат потенцијалните мерки за цената на гасот и пакети за помош за олеснување на домаќинствата и бизнисите поради високите трошоци за енергија.
Некои европски комесари и земји-членки, вклучително и Италија, сакаат да се справат со енергетската криза со слични мерки како што беа воведени за време на кризата со Ковид-19, кога земјите од ЕУ колективно позајмуваа пари.
Освен цените на енергијата, лидерите на ЕУ, исто така, се очекува да разговараат за поддршката за Украина по смртоносниот бран руски ракетни и беспилотни напади.
Подготвено од А.Ѓ.
About Author
