13.10.2022 Скопје
Ноќеска, Генералното собрание на Обединетите нации со големо мнозинство го осуди рускиот обид за нелегална анексија на четири делумно окупирани региони во Украина и ги повика сите земји да не го признаат потегот, зајакнувајќи ја дипломатската меѓународна изолација на Москва.
Одлуката на Генералното собрание на Обединетите нации не е обврзувачка, но резолуцијата ја прогласи анексијата за неважечка и бара Русија да ги поништи своите потези за припојување на источните украински региони Доњецк, Керсон, Луганск и Запорожје.
Три четвртини од 193-те членки на Генералното собрание, или 143 земји, гласаа за резолуцијата, која исто така ги потврдува суверенитетот, независноста, единството и територијалниот интегритет на Украина во нејзините меѓународно признати граници.
Володимир Зеленски, украинскиот претседател, ја прослави одлуката како историска.
Џо Бајден, американскиот претседател, истакна дека резултатот од гласањето е порака до Москва дека не може да избрише една суверена држава од картата на светот.
Само четири земји ѝ се придружија на Русија во гласањето против резолуцијата – Сирија, Никарагва, Северна Кореја и Белорусија. Триесет и пет земји беа воздржани од гласањето, вклучувајќи го и стратешкиот партнер на Русија, Кина, додека останатите не гласаа.
Гласањето во Генералното собрание следи по ветото на Русија од минатиот месец за слична резолуција во 15-члениот Совет за безбедност.
Подготвено од А.Ѓ.
About Author
