17.07.2022 Скопје
Јавноста и денес нема да има можност да види што точно пишува во протоколот и што точно Македонија ќе отстапи во преговорите со Бугарија.
По утрешната средба на амбасадорите на Европска Унија во Брисел, најверојатно ќе биде објавена содржината на протоколот. Познато е дека документот има најмалку 10 страници и содржи конкретни мерки и рокови, особено за расчистување на историските спорови меѓу Софија и Скопје. Ова е втор протокол потпишан меѓу двете земји. Првиот протокол од првиот состанок на мешовитата Меѓувладина комисија меѓу Бугарија и Македонија беше потпишан на 10 јуни 2019 година во Софија.
Потпишувањето на фамозниот протокол следуваше после тридневната дебата во Собранието на Република Северна Македонија и гласање за заклучоците по Информацијата од Владата за предлогот од Франција. Овој документ Османи и Генчовска вешто го криеа две недели, додека се одржуваа протестите во Скопје и останатите градови против прифаќањето на предлогот од Франција и билатералниот протокол. Откако Собранието изгласа „ЗА“ прифаќање на предлогот, Османи и Генчовска го потпишаа клучниот документ за отварање на преговорите со ЕУ.
Подготвено од М.Н.
About Author
